ஆகாஷ் மரண வாக்குமூலம்: “போலீசார் காலைத் தடியால் அடித்து உடைத்தனர்” – சிபிசிஐடி விசாரணைக்கு உயர் நீதிமன்றம் ஆணை!

மானாமதுரை ஆகாஷ் மரண விவகாரத்தில், அவர் இறப்பதற்கு முன் அளித்த மரண வாக்குமூலத்தின் அடிப்படையில், சம்பந்தப்பட்ட காவல்துறையினர் மீது SC/ST Act பிரிவின் கீழ் வழக்குப் பதிவு செய்து, விசாரணையை சிபிசிஐடி-க்கு மாற்றி உயர் நீதிமன்ற மதுரை கிளை உத்தரவிட்டுள்ளது.

அதிர்ச்சியூட்டும் மரண வாக்குமூலம்

விசாரணை கைதியாக இருந்த ஆகாஷ் இறப்பதற்கு முன் அளித்த வாக்குமூலத்தின் நகல் நீதிமன்றத்தில் சமர்ப்பிக்கப்பட்டது. அதில் அவர் கூறியுள்ளதாவது:

• கடத்தல் மற்றும் சித்திரவதை: சீருடையில் இருந்த 4 போலீசார் கண்களை கட்டி தனியிடத்திற்கு அழைத்து சென்றனர். கால்களுக்கு கீழே கற்களை வைத்து, உடல் மீது ஈரச்சாக்கு போட்டு இரும்புக் கம்பியால் சரமாரியாகத் தாக்கினர்.
• கொடூரம்: அடியில் கால் எலும்பு முறிந்து ரத்தம் கொட்டியது; வலியால் அலறியபோதும் அவர்கள் விடவில்லை. கண்கள் கட்டப்பட்டிருந்ததால் அடித்தது யார் என்று தெரியவில்லை.
• மிரட்டல்: மருத்துவமனைக்கு அழைத்து சென்றபோது, உண்மையை சொல்லக் கூடாது என மிரட்டினர். பாலத்தில் இருந்து கீழே விழுந்ததால் அடிபட்டதாக கூறுமாறு போலீசார் கட்டாயப்படுத்தினர்.

நீதிமன்றத்தின் அதிரடி உத்தரவுகள்

இந்த வழக்கினை விசாரித்த நீதிபதி விக்டோரியா கௌரி, காவல்துறையினரின் செயல்பாடுகளுக்கு கடும் கண்டனம் தெரிவித்து பின்வரும் ஆணைகளைப் பிறப்பித்தார்:

• வழக்கு மாற்றம்: ஆகாஷ் பட்டியலினத்தை சேர்ந்தவர் என்பதால், இந்த வழக்கை SC/ST Prevention of Atrocities Act பிரிவின் கீழ் மாற்றிப் பதிவு செய்ய வேண்டும்.
• சிபிசிஐடி விசாரணை: வழக்கின் தீவிரத்தை கருதி, முழுமையான விசாரணைக்காக சிபிசிஐடி-க்கு மாற்ற வேண்டும்.
• போக்குவரத்து மாற்றம்: “பிரதமர், முதல்வர் வருகைக்காகப் போக்குவரத்து பாதையை மாற்றும் நிர்வாகம், ஒரு உயிரிழப்பு விவகாரத்தில் பொதுமக்களுக்காக அதனைச் செய்யக் கூடாதா?” என நீதிபதி கேள்வி எழுப்பினார்.

போராட்டக்காரர்களுக்கு அறிவுறுத்தல்

மானாமதுரையில் நடைபெற்று வரும் போராட்டங்கள் குறித்து நீதிமன்றம் தெரிவித்ததாவது

• வழக்கறிஞர் குழு ஒன்று போராட்டக்காரர்களுடன் பேச்சுவார்த்தை நடத்த வேண்டும்.
• மானாமதுரை பழைய பேருந்து நிலையம் அருகே அமைதியான முறையில் போராட்டத்தைத் தொடரலாம்.
• போராட்டக்காரர்கள் கலைந்து செல்ல மறுத்தால், நீதிமன்றமே அவர்களை அகற்ற உத்தரவிட நேரிடும் என எச்சரிக்கை விடுக்கப்பட்டது.

முந்தைய ரிமாண்ட் ரிப்போர்ட் முரண்பாடு

முன்னதாக, மார்ச் 7-ஆம் தேதி நீதிபதி நேரில் ஆய்வு செய்தபோது, “யார் அடித்தார்கள் என்று தெரியாது, முள் குத்தியதால் காயம் ஏற்பட்டது” என்று ஆகாஷ் கூறியதாகப் பதிவு செய்யப்பட்டிருந்தது. ஆனால், தற்போது வெளிவந்துள்ள மரண வாக்குமூலம், காவல்துறையினர் அவரை மிரட்டிப் பணிய வைத்துள்ளதை உறுதிப்படுத்தியுள்ளது.