கோவில் நிலங்கள் தொடர்பான வழக்குகளை தமிழகத்தில் உள்ள உரிமையியல் நீதிமன்றங்கள் முன்னுரிமை அடிப்படையில் 6 மாதங்களுக்குள் விசாரித்து முடிக்க வேண்டும் என உயர் நீதிமன்ற மதுரை கிளை அதிரடி உத்தரவைப் பிறப்பித்துள்ளது. மேலும், ஆக்கிரமிப்புகளை அகற்ற தவறிய அதிகாரிகள் மற்றும் அதற்கு தடையாக இருந்த அமைப்புகள் மீதும் நீதிமன்றம் அதிருப்தியை வெளிப்படுத்தியுள்ளது.
நீதிமன்ற அவமதிப்பு வழக்கு
கரூர் வெண்ணெய்மலை பாலசுப்பிரமணிய சுவாமி கோவிலுக்கு சொந்தமான சுமார் 507 ஏக்கர் நிலத்தை மீட்க கடந்த 6 ஆண்டுகளுக்கு முன்பே நீதிமன்றம் உத்தரவிட்டிருந்தது. ஆனால், இந்த உத்தரவை செயல்படுத்தாத அதிகாரிகள் மீது நடவடிக்கை எடுக்க கோரி ராதாகிருஷ்ணன் என்பவர் நீதிமன்ற அவமதிப்பு வழக்குத் தொடர்ந்தார். இந்த மனுவை விசாரித்த நீதிபதிகள் ஏ. வேல்முருகன் மற்றும் பி. புகழேந்தி அமர்வு இன்று இந்த முக்கியத் தீர்ப்பை வழங்கியது.
போராட்டம் நடத்தி தடுத்தவர்களுக்கு கண்டனம்
நீதிமன்ற உத்தரவின்படி ஆக்கிரமிப்புகளை அகற்ற சென்ற அதிகாரிகளை, சில அமைப்புகள் போராட்டம் நடத்தி தடுத்தது குறித்து நீதிபதிகள் வருத்தம் தெரிவித்தனர். “சட்டத்திற்குப் புறம்பான செயல்களால் நீதிமன்ற உத்தரவை தடுக்க முடியாது; இத்தகைய போராட்டங்களில் வழக்கறிஞர்களும், மக்கள் பிரதிநிதிகளும் பங்கேற்றிருப்பது துரதிர்ஷ்டவசமானது” என நீதிபதிகள் சாடினர். ஆக்கிரமிப்புகளை அகற்ற எந்த சட்டப்பூர்வ தடையும் இல்லாதபோதும், அறநிலையத்துறை அதிகாரிகள் மெத்தனமாக இருந்ததை நீதிமன்றம் சுட்டிக்காட்டியது.
கண்காணிப்பு மற்றும் பாதுகாப்பு உத்தரவுகள்
- காலக்கெடு: கோவில் நிலங்கள் தொடர்பான அனைத்து சிவில் வழக்குகளையும் 6 மாதங்களுக்குள் முடிக்க வேண்டும்.
- அறிக்கை தாக்கல்: நில மீட்பு நடவடிக்கைகள் மற்றும் வழக்குகளின் நிலை குறித்து ஒவ்வொரு 3 மாதத்திற்கும் ஒருமுறை உயர் நீதிமன்றத்தில் அறிக்கை சமர்ப்பிக்க வேண்டும்.
- காவல்துறை பாதுகாப்பு: வெண்ணெய்மலை கோவில் நிலங்களை மீட்கும் அதிகாரிகளுக்குக் கரூர் மாவட்ட எஸ்பி உரிய பாதுகாப்பு வழங்க வேண்டும்.
- சங்கங்களின் பதிவு ஆய்வு: ஆக்கிரமிப்புக்கு ஆதரவாகப் போராட்டம் நடத்திய அமைப்புகளின் சட்டப்பூர்வத் தன்மை குறித்துச் சங்கங்களின் பதிவாளர் ஆய்வு செய்து, முறைகேடுகள் இருந்தால் அவற்றின் மீது நடவடிக்கை எடுக்க வேண்டும்.
உரிமையியல் நீதிமன்றங்கள் என்றால் என்ன?
நிலத்தகராறுகள், சொத்துப் பிரச்சனைகள் மற்றும் ஒப்பந்தங்கள் தொடர்பான வழக்குகளை விசாரிக்கும் நீதிமன்றங்கள் உரிமையியல் நீதிமன்றங்கள் எனப்படும். பொதுவாக இவ்வகை வழக்குகள் நீண்ட காலம் நடைபெறும் என்பதால், கோவில் சொத்துக்களை விரைவாக பாதுகாக்கும் நோக்கில், இவற்றை 6 மாதங்களுக்குள் முடிக்க வேண்டும் என உயர் நீதிமன்றம் தற்போது சிறப்பு உத்தரவு பிறப்பித்துள்ளது.
