திருச்செந்தூர் சுப்பிரமணிய சுவாமி கோவிலில் அறங்காவலர் குழுவை விரைந்து நியமிக்க கோரிய வழக்கில், தமிழக அரசுக்கு மேலும் நான்கு மாத கால அவகாசம் வழங்கி சென்னை உயர்நீதிமன்ற மதுரை கிளை உத்தரவிட்டுள்ளது. முறையான நடைமுறைகளைப் பின்பற்றி தகுதியான நபர்களைத் தேர்ந்தெடுக்க வேண்டும் என்றும் நீதிபதிகள் அறிவுறுத்தியுள்ளனர்.
தனி நபர் நிர்வாகத்திற்கு எதிர்ப்பு
திருச்செந்தூர் கோவிலில் தற்போது தனி நபர் தக்காராக செயல்பட்டு வருவது இந்து அறநிலையத்துறை சட்டத்திற்கு எதிரானது என மனுதாரர் தரப்பில் வாதிடப்பட்டது. குறிப்பாக, அறங்காவலர் குழுவில் ஒரு பெண் மற்றும் ஒரு பட்டியலினத்தவர் இடம்பெற வேண்டும் என்ற அரசின் சமூக நீதி கொள்கைக்கு இது முரணாக இருப்பதாகவும், எனவே உடனடியாக அறங்காவலர் குழுவை அமைக்க வேண்டும் என்றும் வலியுறுத்தப்பட்டது.
டெண்டர் முறைகேடு புகார் மற்றும் ரத்து
கோவிலில் பூஜை பொருட்கள் விற்பனை செய்யும் 70 கடைகளுக்கான ஏல அறிவிப்பில் முறையான நடைமுறைகள் பின்பற்றப்படவில்லை என்றும், அடிப்படை வாடகை மிகக் குறைவாக நிர்ணயம் செய்யப்பட்டுள்ளதாகவும் புகார் எழுந்தது. இந்த வழக்கு விசாரணையின் போது, சர்ச்சைக்குரிய அந்த ஏல அறிவிப்பை கோவில் நிர்வாகம் ரத்து செய்துவிட்டதாகத் தமிழக அரசு தரப்பில் தெரிவிக்கப்பட்டது.
நீதிமன்றத்தின் முக்கிய வழிகாட்டுதல்கள்
அறங்காவலர் பதவிக்கு இதுவரை ஒரே ஒரு விண்ணப்பம் மட்டுமே வந்துள்ளதாக அரசு தரப்பு கூடுதல் தலைமை வழக்கறிஞர் தெரிவித்தார். இதனைத் தொடர்ந்து, தகுதியான நபர்களைக் கண்டறிய ஏதுவாக, அறங்காவலர் குழு நியமனம் குறித்த விளம்பரத்தை அதிக அளவில் விற்பனையாகும் தமிழ் நாளிதழ்களிலும், கோவில் இணையதளத்திலும் வெளியிட வேண்டும் என்று நீதிபதிகள் சதீஷ்குமார் மற்றும் ஜோதிராமன் அமர்வு உத்தரவிட்டது.
