தமிழக அரசு அண்மையில் அறிமுகப்படுத்திய புதிய உறுதியளிக்கப்பட்ட ஓய்வூதியத் திட்டத்தை எதிர்த்துத் தொடரப்பட்ட வழக்கில், மார்ச் 26-ஆம் தேதிக்குள் தமிழக அரசு விரிவான பதிலை தாக்கல் செய்ய வேண்டும் என நீதிபதி பி.டி. ஆஷா உத்தரவிட்டுள்ளார். பழைய ஓய்வூதிய திட்டத்தைப் போலவே, தமக்கும் உரிய பலன்கள் கிடைக்க வேண்டும் என ஓய்வுபெற்ற ஆசிரியர் ஒருவர் தொடர்ந்த வழக்கின் அடிப்படையில் இந்த உத்தரவு பிறப்பிக்கப்பட்டுள்ளது.
வழக்கின் பின்னணி மற்றும் மனுதாரர் கோரிக்கை
புதிய பங்களிப்பு ஓய்வூதியத் திட்டத்திற்கு (CPS) எதிர்ப்பு தெரிவித்து அரசு ஊழியர்கள் போராடி வந்த நிலையில், கடைசியாக பெற்ற ஊதியத்தில் 50 சதவீதத்தை ஓய்வூதியமாக வழங்கும் ‘புதிய உறுதியளிக்கப்பட்ட ஓய்வூதிய திட்டத்தை’ (Assured Pension Scheme) தமிழக அரசு அரசாணையாக வெளியிட்டது. இதனை எதிர்த்து, விருப்ப ஓய்வுபெற்ற அரசு உதவிபெறும் பள்ளி ஆசிரியர் ரேணுகாதேவி என்பவர் சென்னை உயர் நீதிமன்றத்தில் மனுத் தாக்கல் செய்துள்ளார்.
2025-க்கு முன் ஓய்வு பெற்றவர்களின் நிலை என்ன?
புதிய உறுதியளிக்கப்பட்ட ஓய்வூதியத் திட்டம் 2026-ஆம் ஆண்டு ஜனவரி முதல் அமலுக்கு வரும் என அறிவிக்கப்பட்டுள்ளது. இதனால், 2025-ஆம் ஆண்டு டிசம்பர் 31-ஆம் தேதிக்கு முன்பே ஓய்வு பெற்றவர்கள் இந்தத் திட்டத்தின் பலன்களைப் பெற முடியாமல் பாதிக்கப்பட்டுள்ளதாக மனுதாரர் தரப்பில் வாதிடப்பட்டது. அரசு ஊழியர்கள் ஓய்வுபெறும் தேதியைக் கணக்கில் கொள்ளாமல், அனைவருக்கும் சமமான ஓய்வூதியத்தை வழங்க வேண்டும் என்பதே மனுதாரரின் முக்கியக் கோரிக்கையாக உள்ளது.
நிதி இருப்பு மற்றும் இடைக்கால நிவாரணம்
பங்களிப்பு ஓய்வூதியத் திட்டத்தின் கீழ் அரசு ஊழியர்கள் செலுத்திய சுமார் 73 ஆயிரம் கோடி ரூபாய் LIC நிறுவனத்தில் இருப்பதாக நிதி அமைச்சர் குறிப்பிட்டுள்ளார். எனவே, 2025-க்கு முன் ஓய்வுபெற்றவர்களுக்கு ஓய்வூதியம் வழங்குவதில் நிதிச் சிக்கல் இருக்காது என மனுவில் சுட்டிக்காட்டப்பட்டுள்ளது. மேலும், இடைக்கால நிவாரணமாக மாதம் 8,430 ரூபாயுடன் அகவிலைப்படியும் சேர்த்து வழங்க உத்தரவிட வேண்டும் எனவும் கோரப்பட்டுள்ளது.
உறுதியளிக்கப்பட்ட ஓய்வூதிய திட்டம் என்றால் என்ன?
இது பழைய ஓய்வூதியத் திட்டத்திற்கும் (OPS), புதிய பங்களிப்பு ஓய்வூதியத் திட்டத்திற்கும் (CPS) இடைப்பட்ட ஒரு திட்டமாகும். பழைய திட்டத்தில் அரசு முழுப்பணத்தையும் வழங்கியது; புதிய (CPS) திட்டத்தில் ஊழியரின் பங்களிப்பு அவசியம். தற்போது அறிவிக்கப்பட்டுள்ள உறுதியளிக்கப்பட்ட திட்டத்தில், ஊழியர் தனது பணிக்காலத்தில் செலுத்திய பங்களிப்பின் அடிப்படையில், அவர் கடைசியாக வாங்கிய சம்பளத்தில் சரிபாதி (50%) ஓய்வூதியமாக தருவதற்கு அரசு உத்தரவாதம் அளிக்கிறது.
