மாநில பார் கவுன்சில் தேர்தல்களில் (State Bar Council Elections) குறைந்த வாக்குகள் வித்தியாசத்தில் வெற்றியைத் தவறவிட்ட பெண் வேட்பாளர்களை, 10 சதவீத இணைந்த தேர்வு (Co-option) ஒதுக்கீட்டின் கீழ் நியமிக்க அனுமதி கோரி அகில இந்திய பார் கவுன்சில் உச்ச நீதிமன்றத்தில் மனுத்தாக்கல் செய்துள்ளது.
வழக்கின் பின்னணி (30% இடஒதுக்கீடு உத்தரவு)
மாநில பார் கவுன்சில்களில் பெண் வழக்கறிஞர்களின் பங்களிப்பை உறுதி செய்ய, கடந்த ஆண்டு டிசம்பர் மாதம் உச்ச நீதிமன்றம் ஒரு வரலாற்றுச் சிறப்புமிக்க உத்தரவைப் பிறப்பித்திருந்தது:
- 30% கட்டாய இடஒதுக்கீடு: மாநில பார் கவுன்சில் தேர்தல்களில் பெண்களுக்கு 30 சதவீத இடஒதுக்கீடு வழங்கப்பட வேண்டும்.
- 10% இணைந்த தேர்வு (Co-option): இதில் 20 சதவீத இடங்கள் நேரடித் தேர்தல் மூலம் நிரப்பப்பட வேண்டும். ஒருவேளை தகுதியான பெண் வேட்பாளர்கள் தேர்தல் மூலம் தேர்ந்தெடுக்கப்படாவிட்டால், மீதமுள்ள 10 சதவீத இடங்களை ‘இணைந்த தேர்வு’ (Co-option) முறையில் நிரப்பிக் கொள்ளலாம் என நீதிமன்றம் தெளிவுபடுத்தியிருந்தது.
இதனைத் தொடர்ந்து, ஓய்வுபெற்ற உச்ச நீதிமன்ற நீதிபதி சுதான்ஷு துலியா தலைமையிலான உயர் மட்டக் கண்காணிப்புக் குழு, இந்த 10% இணைந்த தேர்வை எந்த முறையில் நடத்தலாம் என ஆய்வு செய்து வந்தது.
BCI முன்வைக்கும் புதிய ஜனநாயக வழிமுறை
பொதுவாக இணைந்த தேர்வு (Co-option) என்பது நிர்வாக அமைப்பால் தன்னிச்சையாகவோ அல்லது பரிந்துரையின் அடிப்படையிலோ தேர்ந்தெடுக்கப்படும். ஆனால், அதில் முறைகேடுகள் அல்லது பாரபட்சம் ஏற்படுவதைத் தவிர்க்க BCI ஒரு புதிய மற்றும் நேர்மையான வழிமுறையைத் தற்பொழுது முன்மொழிந்துள்ளது.
அதன்படி, தேர்தலில் போட்டியிட்டுப் பொதுமக்களின் (வழக்கறிஞர்களின்) வாக்குகளைப் பெற்று, இறுதிச் சுற்றில் நூலிழப்பில் வெற்றியைத் தவறவிட்ட பெண் வேட்பாளர்களை இந்த 10% இட ஒதுக்கீட்டில் நியமிக்க அனுமதி கோரியுள்ளது.
பணியிடங்களின் எண்ணிக்கை வாரியான BCI-இன் கணக்கீடு:
- 25 உறுப்பினர்கள் கொண்ட கவுன்சில்: 25 பேர் தேர்ந்தெடுக்கப்பட வேண்டிய இடத்தில், தேர்தல் முடிவில் 6 மற்றும் 7-வது இடங்களைப் பிடித்த பெண் வேட்பாளர்கள் இணைந்த தேர்வு செய்யப்பட வேண்டும்.
- 20 உறுப்பினர்கள் கொண்ட கவுன்சில்: 20 பேர் தேர்ந்தெடுக்கப்பட வேண்டிய இடத்தில், 5 மற்றும் 6-வது இடங்களைப் பிடித்த பெண் வேட்பாளர்கள் தேர்ந்தெடுக்கப்பட வேண்டும்.
- 15 உறுப்பினர்கள் கொண்ட கவுன்சில்: 15 பேர் தேர்ந்தெடுக்கப்பட வேண்டிய இடத்தில், 4-வது இடத்தைப் பிடித்த பெண் வேட்பாளர் நேரடியாக இணைந்த தேர்வு செய்யப்பட வேண்டும்.
“சுயவிருப்பத் தேர்வுக்கு இடமில்லை; இதுவே மிக வெளிப்படையானது”
புதன்கிழமை (மே 20, 2026) அன்று வெளியிட்டுள்ள செய்திக்குறிப்பில், உச்ச நீதிமன்றத்தின் முந்தைய வழிகாட்டுதலின்படி, இந்தத் தேர்வு முறையே (Option A) மிகச் சிறந்தது என BCI ஒருமனதாக ஆதரித்துள்ளது.
நீதிமன்றத்தில் BCI முன்வைத்துள்ள முக்கிய வாதங்கள்:
- ஜனநாயக முறை: வழக்கறிஞர்கள் ஏற்கனவே அளித்த வாக்குகளின் அடிப்படையில் இந்த நியமனம் அமைவதால், இது வழக்கறிஞர்கள் சட்டம், 1961 (Advocates Act, 1961)-ன் கீழ் உள்ள ஜனநாயகக் கோட்பாடுகளுக்கு உகந்ததாக இருக்கும்.
- வெளிப்படைத்தன்மை: இதன் மூலம் தனி நபர்களின் விருப்பு வெறுப்புகளுக்கோ, வாரிசு அரசியலுக்கோ அல்லது தன்னிச்சையான அதிகாரப் பயன்பாட்டிற்கோ (Arbitrariness) முற்றுப்புள்ளி வைக்கப்படும். எந்தவொரு பாரபட்சப் புகாருக்கும் இதில் இடமிருக்காது.
