“அறுவை சிகிச்சையைத் தீர்மானிக்கும் நீதிபதி மருத்துவரே!” – உச்ச நீதிமன்றம்

அறுவை சிகிச்சை அறையில் எந்த மாதிரியான சிகிச்சையை மேற்கொள்ள வேண்டும் என்பதைத் தீர்மானிக்கும் ‘நீதிபதி’யாக மருத்துவரே விளங்குகிறார் எனக் குறிப்பிட்ட உச்ச நீதிமன்றம், ஒன்றரை வயது குழந்தைக்குத் தவறான சிகிச்சை அளித்ததாக மருத்துவர் மீது தொடரப்பட்ட வழக்கை ரத்து செய்து உத்தரவிட்டுள்ளது.

வழக்கின் பின்னணி

ஒன்றரை வயது குழந்தை ஒன்றுக்கு, அதன் இடது பக்க விதைப்பையில் (Testis) இருந்த குறைபாட்டைச் சரிசெய்வதற்கான அறுவை சிகிச்சைக்காக தனியார் மருத்துவமனையில் சேர்க்கப்பட்டது. அறுவை சிகிச்சையை மேற்கொண்ட குழந்தைகள் நல மருத்துவர் எஸ். பாலகோபால், விதையை அதற்கான பையில் சேர்ப்பதற்குப் பதிலாக, அந்த விதையை முழுமையாக நீக்கினார். தனது அனுமதியின்றி குழந்தையின் விதை நீக்கப்பட்டதாகக் கூறி, குழந்தையின் தந்தை அம்பத்தூர் காவல் நிலையத்தில் புகார் அளித்தார். இந்த வழக்கு பூந்தமல்லி நீதிமன்றத்தில் விசாரணையில் இருந்தது.

சட்டப் போராட்டம்

தன் மீதான வழக்கை ரத்து செய்யக் கோரி மருத்துவர் பாலகோபால் தாக்கல் செய்த மனுவை சென்னை உயர் நீதிமன்றம் முன்னதாகத் தள்ளுபடி செய்திருந்தது. இதனை எதிர்த்து, மூத்த வழக்கறிஞர்கள் கே. ரவி அனந்தபத்மநாபன் மற்றும் டி.ஆர்.பி. சிவக்குமார் ஆகியோர் மூலம் உச்ச நீதிமன்றத்தில் மேல்முறையீடு செய்யப்பட்டது.

உச்ச நீதிமன்றத்தின் அதிரடித் தீர்ப்பு

இந்த மேல்முறையீட்டை விசாரித்த நீதிபதிகள் பி.எஸ். நரசிம்மா மற்றும் மனோஜ் மிஸ்ரா ஆகியோர் அடங்கிய அமர்வு அறுவை சிகிச்சைக்கான ஒப்புதல் படிவத்தில் விதையை கீழிறக்குவது அல்லது அகற்றுவது (Orchidopexy or Orchidectomy) என்று தெளிவாகக் குறிப்பிடப்பட்டுள்ளது. இதில் எந்த இடைச்செருகலும் இல்லை. அந்த விதையை அகற்றாவிட்டால் எதிர்காலத்தில் அதன் வீரியம் குறைந்துவிடும் என்று மருத்துவக் குழு தெரிவித்துள்ளது. எனவே, குழந்தையின் எதிர்கால நலன் கருதியே அந்த முடிவு எடுக்கப்பட்டுள்ளது. அறுவை சிகிச்சை அரங்கில் எந்த சிகிச்சை நோயாளிக்கு தேவை என்பதை தீர்மானிக்கும் நீதிபதியாக மருத்துவரே விளங்குகிறார் என்று நீதிபதிகள் குறிப்பிட்டனர்.

நீதிமன்றத்தின் முடிவு

மருத்துவர் பாலகோபால் மீதான வழக்கை மேலும் நடத்துவது என்பது நீதிமன்ற நடைமுறைகளைத் தவறாகப் பயன்படுத்துவதற்கு சமம் எனக் கருதிய நீதிபதிகள், பூந்தமல்லி நீதிமன்றத்தில் நிலுவையில் இருந்த வழக்கையும், அதை ரத்து செய்ய மறுத்த சென்னை உயர் நீதிமன்றத்தின் உத்தரவையும் ரத்து செய்து உத்தரவிட்டனர்.

இந்தத் தீர்ப்பு, இக்கட்டான மருத்துவ சூழல்களில் மருத்துவர்கள் எடுக்கும் தொழில்முறை சார்ந்த முடிவுகளுக்கு (Professional Judgment) சட்ட ரீதியான பாதுகாப்பை உறுதி செய்யும் வகையில் அமைந்துள்ளது.