நீதித்துறை குறித்த பாடப்புத்தக சர்ச்சை – உயர்மட்ட நிபுணர் குழுவை அமைத்தது உச்ச நீதிமன்றம்!

NCERT பாடப்புத்தகத்தில் இடம்பெற்ற “நீதித்துறையில் ஊழல்” (Corruption in Judiciary) என்ற சர்சைக்குரிய பாடங்களை நீக்கிவிட்டு, தகுந்த நிபுணர்களின் ஆலோசனையுடன் புதிய சட்டக் கல்வி (Legal Studies) பாடத்திட்டத்தை உருவாக்க உச்ச நீதிமன்றம் உத்தரவிட்டுள்ளது.

வழக்கின் பின்னணி

NCERT வெளியிட்ட எட்டாம் வகுப்பு சமூக அறிவியல் பாடப்புத்தகத்தில், நீதித்துறையில் நிலவும் ஊழல் குறித்து இடம்பெற்றிருந்த கருத்துகள் அதன் நற்பெயருக்குக் களங்கம் விளைவிப்பதாகக் கருதப்பட்டது. இதனை அடுத்து, கடந்த பிப்ரவரி மாதம் உச்ச நீதிமன்றம் தாமாக முன்வந்து (Suo Motu) இந்த வழக்கைப் பதிவு செய்தது.

NCERT இயக்குனர் இதற்காக நிபந்தனையற்ற மன்னிப்பு கோரினார். அந்தப் பாடப்புத்தகங்கள் முழுமையாகத் திரும்பப் பெறப்பட்டு, டிஜிட்டல் நகல்களும் இணையதளத்திலிருந்து நீக்கப்பட்டன.

நிபுணர் குழு அமைப்பு

மத்திய அரசின் சொலிசிட்டர் ஜெனரல் துஷார் மேத்தா, இந்தப் பாடத்திட்டத்தை மறுஆய்வு செய்து இறுதி செய்ய ஒரு உயர்மட்ட நிபுணர் குழுவை அமைப்பதாக நேற்று நீதிமன்றத்தில் தெரிவித்தார்.

இந்த குழுவில் உச்ச நீதிமன்ற முன்னாள் நீதிபதி இந்து மல்கோத்ரா, முன்னாள் அட்டர்னி ஜெனரல் மற்றும் மூத்த வழக்கறிஞர் கே.கே. வேணுகோபால் மற்றும் தேசிய நீதித்துறை அகாடமியின் இயக்குனர் மற்றும் முன்னாள் உச்ச நீதிமன்ற நீதிபதி அனிருத்தா போஸ் ஆகியோர் முக்கிய நபர்களாக இடம்பெற்றுள்ளனர். இவர்களுடன் ஒரு முன்னணிப் பல்கலைக்கழகத்தின் துணைவேந்தரும் இக்குழுவில் இடம்பெறுவார்.

குழுவின் முக்கியப் பணிகள்

எட்டாம் வகுப்பு மற்றும் அதற்கு மேற்பட்ட வகுப்புகளுக்கான சட்டக் கல்வி (Legal Studies) பாடத்திட்டத்தை இக்குழு முழுமையாக ஆய்வு செய்யும். நீதித்துறையின் கட்டமைப்பு, அதன் செயல்பாடுகள் மற்றும் கண்ணியம் சிதையாத வகையில் மாணவர்களுக்கு சரியான புரிதலை வழங்கும் பாடங்களை உருவாக்கும். இந்தத் திருத்தப்பட்ட பாடங்கள் வரும் 2026-27 கல்வியாண்டில் புதிய பாடப்புத்தகங்களாக அறிமுகப்படுத்தப்படும்.