கடந்த 2025-ஆம் ஆண்டு சென்னையில் நடைபெற்ற நிகழ்ச்சி ஒன்றில் கலந்துக்கொண்டு மத உணர்வுகளைப் புண்படுத்தும் விதமாக பேசியதாக தொடரப்பட்ட வழக்கில், பொன்முடி நேரில் ஆஜராவதிலிருந்து விலக்கு கோரிய நிலையில் நீதிமன்றம் புதிய உத்தரவைப் பிறப்பித்துள்ளது.
வழக்கின் பின்னணி
கடந்த 2025-ஆம் ஆண்டு ஏப்ரல் மாதம் சென்னையில் நடைபெற்ற ஒரு பொது நிகழ்ச்சியில் முன்னாள் அமைச்சர் பொன்முடி கலந்து கொண்டு பேசினார். அப்போது சைவ, வைணவ சமயங்கள் குறித்தும், பெண்கள் குறித்தும் அவர் தெரிவித்த கருத்துகள் சர்ச்சையை ஏற்படுத்தின. இது தொடர்பாக சென்னை மாநகராட்சி கவுன்சிலர் உமா ஆனந்தன், சைதாப்பேட்டை மாஜிஸ்திரேட் நீதிமன்றத்தில் தனிநபர் புகார் மனுவைத் தாக்கல் செய்தார்.
மத ரீதியாக வெறுப்புணர்வைத் தூண்டுதல், மத உணர்வுகளைப் புண்படுத்துதல் ஆகிய பிரிவுகளின் கீழ் பொன்முடி மீது நடவடிக்கை எடுத்து அவரைத் தண்டிக்க வேண்டும் என அந்த மனுவில் கோரப்பட்டிருந்தது.
சிறப்பு நீதிமன்றத்திற்கு மாற்றப்பட்ட வழக்கு
இந்த விவகாரத்தில் குற்றம் சாட்டப்பட்டவர் மக்கள் பிரதிநிதி என்பதால், இந்த வழக்கு எம்.பி – எம்.எல்.ஏ.க்கள் மீதான வழக்குகளை விசாரிக்கும் சிறப்பு நீதிமன்றமான ஜார்ஜ் டவுன் மாஜிஸ்திரேட் நீதிமன்றத்திற்கு மாற்றப்பட்டது. இந்த மனுவை ஏற்கனவே விசாரித்த நீதிமன்றம், இன்று (மார்ச் 24, 2026) பொன்முடி நேரில் ஆஜராக வேண்டும் என சம்மன் அனுப்பியிருந்தது.
இன்றைய விசாரணை மற்றும் சம்மன்
இந்த வழக்கு இன்று நீதிபதி சவுந்திர பாண்டியன் முன்னிலையில் விசாரணைக்கு வந்தது. பொன்முடி இன்று நீதிமன்றத்தில் நேரில் ஆஜராகவில்லை. அவர் தரப்பில் ஆஜரான வழக்கறிஞர், “கீழ் நீதிமன்றம் அனுப்பிய சம்மனை எதிர்த்து சென்னை உயர் நீதிமன்றத்தில் மனுத் தாக்கல் செய்யப்பட்டுள்ளது. எனவே, இன்று ஒரு நாள் மட்டும் ஆஜராவதிலிருந்து விலக்கு அளிக்க வேண்டும்” என வாதிட்டார்.
இந்த வாதத்தை ஏற்றுக்கொண்ட நீதிபதி, விசாரணையைத் தள்ளி வைத்தார். வரும் மே 12, 2026 அன்று முன்னாள் அமைச்சர் பொன்முடி கண்டிப்பாக நேரில் ஆஜராக வேண்டும் என மீண்டும் சம்மன் அனுப்ப உத்தரவிட்டார்.
