“நிலம் கையகப்படுத்த சுற்றுச்சூழல் அனுமதி தேவையில்லை!” – சிப்காட் வழக்கில் சென்னை உயர் நீதிமன்றத்தின் விளக்கம்!

திருவள்ளூர் மாவட்டத்தில் 4,326 ஏக்கர் நிலத்தை சிப்காட் தொழிற்பேட்டைக்காக கையகப்படுத்தும் நடவடிக்கையில், “சுற்றுச்சூழல் அனுமதி (EC) எப்போது பெற வேண்டும்?” என்பது குறித்துச் சென்னை உயர் நீதிமன்றம் ஒரு முக்கியத் தீர்ப்பை வழங்கியுள்ளது.

வழக்கின் பின்னணி

திருவள்ளூர் மாவட்டத்தை சேர்ந்த மணலூர், சூரப்பூண்டி உள்ளிட்ட ஐந்து கிராமங்களில் சிப்காட் தொழிற்பேட்டை அமைப்பதற்காக தமிழக அரசு நிலம் கையகப்படுத்தும் பணியைத் தொடங்கியது. சுற்றுச்சூழல் அனுமதி பெறாமலேயே நிலம் கையகப்படுத்தும் அறிவிப்பை (Section 3(1)) அரசு வெளியிட்டது சட்டவிரோதம் என நில உரிமையாளர்கள் மற்றும் விவசாயிகள் நீதிமன்றத்தில் வழக்குத் தொடர்ந்தனர்.

4,326 ஏக்கர் விவசாய நிலங்கள் பாதிக்கப்படுவதால், முன்கூட்டியே சுற்றுச்சூழல் ஆய்வு நடத்தப்பட வேண்டும் என்பது அவர்களின் முக்கிய வாதமாக இருந்தது.

தீர்ப்பு

இந்த வழக்கை விசாரித்த நீதிபதி, நிலம் கையகப்படுத்தும் நடைமுறைகளைத் தொடங்குவதற்கு (Paper work) சுற்றுச்சூழல் அனுமதி முன்கூட்டியே தேவையில்லை. ஆனால், கையகப்படுத்தப்பட்ட நிலத்தில் உண்மையான கட்டுமானப் பணிகள் அல்லது நிலத்தை தயார் செய்யும் பணிகளைத் (Ground work) தொடங்குவதற்கு முன்பாகக் கட்டாயம் சுற்றுச்சூழல் அனுமதி பெற்றிருக்க வேண்டும் என தெளிவுப்படுத்தினார்.

நிலம் கையகப்படுத்துவதற்கான ‘பிரிவு 3(1)’ அறிவிப்பை வெளியிடுவது என்பது கட்டுமானப் பணியாகக் கருதப்படாது. எனவே, அனுமதி இல்லாமலேயே இந்த அறிவிப்பை வெளியிடுவது சட்டப்படி செல்லும் என அவர் திட்டவட்டமாக தெரிவித்தார்.

நில உரிமையாளர்களுக்கான பாதுகாப்பு

கையகப்படுத்தப்பட்ட நிலம் நீண்ட காலம் பயன்படுத்தப்படாமல் இருந்தால், அதனை மீண்டும் உரிமையாளரிடமே ஒப்படைக்கவும், இடைப்பட்ட கால இழப்புகளுக்கு இழப்பீடு வழங்கவும் சட்டத்தில் இடமுள்ளது.

சுற்றுச்சூழல் அனுமதி தொடர்பான மேல்முறையீடுகள் பசுமைத் தீர்ப்பாயத்தில் நிலுவையில் இருப்பது, நிலம் கையகப்படுத்தும் பணிகளைத் தடுத்து நிறுத்தாது.

கட்டுமானத்தைத் தொடங்குவதற்கு முன் சிப்காட் நிறுவனம் கட்டாயம் ‘சுற்றுச்சூழல் அனுமதிச் சான்றிதழைப்’ பெற வேண்டும் என நீதிபதி தனது உத்தரவில் உறுதிப்படுத்தியுள்ளார்.

ஏன் இந்தத் தீர்ப்பு முக்கியமானது?

ஒரு பெரிய திட்டத்தைத் தொடங்கும் போது, நிலம் அரசின் கைக்கு வந்த பிறகுதான் அங்கு என்ன மாதிரியான தொழிற்சாலைகள் வரும் என்பது முடிவாகும். அதன் பின்னரே அதன் சுற்றுச்சூழல் தாக்கம் (EIA) குறித்துத் துல்லியமாக ஆய்வு செய்ய முடியும். எனவே, நிலம் கையகப்படுத்தும் 'நிர்வாக நடைமுறைக்கு' சுற்றுச்சூழல் அனுமதி தேவையில்லை என்றும், ஆனால் 'இயற்பியல் மாற்றங்களுக்கு' (கட்டுமானம்) அது அவசியம் என்றும் நீதிமன்றம் ஒரு சமநிலையான தீர்ப்பை வழங்கியுள்ளது.