“மக்களின் உயிரோடு விளையாடுவதா?” – தாமிரபரணி ஆற்றில் சட்டவிரோத படகு சவாரிக்கு உயர் நீதிமன்றம் இடைக்காலத் தடை!

கன்னியாகுமரி மாவட்டம் திற்பரப்பு பகுதியில் தாமிரபரணி ஆற்றில் முறையான அனுமதியும், பாதுகாப்பும் இன்றி சுற்றுலாப் பயணிகளை ஏற்றி சென்ற விவகாரத்தில், சென்னை உயர் நீதிமன்ற மதுரை கிளை படகுகளை இயக்க இடைக்காலத் தடை விதித்துள்ளது. இது குறித்து குமரி மாவட்ட ஆட்சியர் பதிலளிக்கவும் நீதிபதிகள் உத்தரவிட்டுள்ளனர்.

வழக்கின் பின்னணி

திற்பரப்பை சேர்ந்த பிரபு என்பவர் தாக்கல் செய்துள்ள மனுவில் தனது விவசாய நிலத்திற்குச் செல்லப் பரிசிலைப் பயன்படுத்தியபோது, அங்கு இரு படகுகளில் முறையே 35 மற்றும் 12 சுற்றுலாப் பயணிகள் (மொத்தம் 47 பேர்) எவ்விதப் பாதுகாப்பு கவசங்களும் இன்றி ஆபத்தான முறையில் செல்வதைக் கண்டுள்ளார். அருமனையைச் சேர்ந்த பிராங்கோ என்பவர் எவ்வித முறையான அனுமதியுமின்றி இந்தப் படகுகளை இயக்கி வந்துள்ளார். இதற்குத் திற்பரப்பு மற்றும் கடையல் பேரூராட்சி செயல் அலுவலர்கள் துணை போயுள்ளனர். இது குறித்துக் கேள்வி எழுப்பியதால், மனுதாரர் மீது பொய்ப் புகார் அளிக்கப்பட்டு, அவரது விவசாயப் பணிக்குப் பயன்படுத்தும் பரிசைக் காவல்துறை பறிமுதல் செய்துள்ளது.

மனுதாரரின் கோரிக்கை

பொய்ப் புகாரின் அடிப்படையில் பறிமுதல் செய்யப்பட்ட தனது பரிசிலை நிபந்தனையின்றித் திரும்ப ஒப்படைக்க வேண்டும். சட்டவிரோத படகு சவாரிக்கு துணை போன பேரூராட்சி அதிகாரிகள் மற்றும் பிராங்கோ மீது மனித உயிருக்கு அச்சுறுத்தல் ஏற்படுத்தியதற்காக நடவடிக்கை எடுக்க வேண்டும். விதிமுறைகளை மீறி இயக்கப்படும் அனைத்துப் படகுகளையும் பறிமுதல் செய்ய வேண்டும் என மனுதாரர் கோரிக்கை வைத்தார்.

உயர் நீதிமன்ற நீதிபதிகளின் கடும் கண்டனம்

இந்த மனு நீதிபதிகள் சதீஷ்குமார் மற்றும் ஜோதிராமன் ஆகியோர் அடங்கிய அமர்வு முன் விசாரணைக்கு வந்தது, “ஒரு பஞ்சாயத்து நிர்வாகம் எப்படி முறையான அனுமதியின்றிப் படகுகளை இயக்க அனுமதி வழங்க முடியும்?” என நீதிபதிகள் கேள்வி எழுப்பினர். திற்பரப்பு பகுதியில் தாமிரபரணி ஆற்றில் படகுகளை இயக்க உடனடியாக இடைக்காலத் தடை விதித்து நீதிபதிகள் உத்தரவிட்டனர். இந்த விவகாரம் குறித்துக் கன்னியாகுமரி மாவட்ட ஆட்சியர் விரிவான பதிலளிக்க உத்தரவிட்டு, வழக்கின் விசாரணையை 2 வாரங்களுக்கு ஒத்திவைத்தனர்.

நீர்நிலைகளில் படகு சவாரி செய்ய என்ன விதிகள் உள்ளன?

தமிழ்நாடு உள்நாட்டுப் படகுகள் விதிகள் (Tamil Nadu Inland Vessels Rules) படி, சுற்றுலாப் பயணிகளை ஏற்றிச் செல்லும் படகுகள் முறையாகப் பதிவு செய்யப்பட்டிருக்க வேண்டும். ஒவ்வொரு பயணிக்கும் மிதவை உடைகள் (Life Jackets) கட்டாயம் வழங்கப்பட வேண்டும். படகின் கொள்ளளவை விட அதிகமானோரை ஏற்றுவது தண்டனைக்குரிய குற்றமாகும். குறிப்பாக, ஆற்று நீர் வேகம் அதிகமாக உள்ள திற்பரப்பு போன்ற பகுதிகளில் இத்தகைய விதிமீறல்கள் பெரும் விபத்துகளுக்கு வழிவகுக்கும் என்பதால் நீதிமன்றம் இந்தத் தடையை விதித்துள்ளது.