சவுக்கு சங்கர் தனிமைச் சிறையில் அடைக்கப்பட்டுள்ளதாக அவரது தாயார் தொடர்ந்த மனுவை விசாரித்த நீதிமன்றம், இந்த விவகாரத்தில் காவல்துறையின் சட்டப்படியான நடவடிக்கைகளுக்குப் பச்சைக்கொடி காட்டியுள்ளது.
வழக்கின் பின்னணி
கடந்த டிசம்பர் 13-ஆம் தேதி, ஆதம்பாக்கம் மற்றும் சைதாப்பேட்டை போலீஸார் பதிவு செய்த மோசடி வழக்குகளின் அடிப்படையில் சவுக்கு சங்கர் கைது செய்யப்பட்டார். சவுக்கு சங்கர் சிறையில் தனிமைப்படுத்தப்பட்டுள்ளதாகக் கூறி, அவரை மீட்கக் கோரி அவரது தாயார் கமலா ‘ஆட்கொணர்வு மனு’ (Habeas Corpus) தாக்கல் செய்திருந்தார். மேலும், அவருக்கு முறையான மருத்துவச் சிகிச்சை அளிக்கக் கோரி மற்றொரு ‘ரிட்’ மனுவையும் தாக்கல் செய்திருந்தார்.
ஜாமீன் மற்றும் நிபந்தனைகள் தொடர்பான சிக்கல்
இந்த வழக்கின் இடையில் சவுக்கு சங்கருக்கு மார்ச் 25-ஆம் தேதி வரை இடைக்கால ஜாமீன் வழங்கப்பட்டிருந்தது. அந்த ஜாமீனை ரத்து செய்யக் கோரி காவல்துறை தாக்கல் செய்த மனுவை நீதிமன்றம் நிராகரித்தாலும், சில கடுமையான நிபந்தனைகளை விதித்திருந்தது. இந்த நிபந்தனைகளை மறு ஆய்வு செய்யக் கோரி சவுக்கு சங்கர் தரப்பில் மனுத் தாக்கல் செய்யப்பட்டிருந்தது
உயர் நீதிமன்றத்தின் இன்றைய தீர்ப்பு
நீதிபதிகள் பி.வேல்முருகன் மற்றும் எம்.ஜோதிராமன் ஆகியோர் அடங்கிய அமர்வு இன்று இந்த வழக்க விசாரித்து, சவுக்கு சங்கர் தனிமைச் சிறையில் அடைக்கப்பட்டதாகத் தொடரப்பட்ட ஆட்கொணர்வு மனுவைத் தள்ளுபடி செய்து உத்தரவிட்டனர்.
ஆட்கொணர்வு மனுவே தள்ளுபடி செய்யப்பட்டுவிட்டதால், இடைக்கால ஜாமீன் நிபந்தனைகளைத் தளர்த்தக் கோரி சவுக்கு சங்கர் தாக்கல் செய்த மனு ‘காலாவதி’ ஆகிவிட்டதாகக் கூறி அதனையும் தள்ளுபடி செய்தனர்.
மகனுக்குத் தகுந்த மருத்துவச் சிகிச்சை கோரிய ரிட் மனுவை நீதிபதிகள் முடித்து வைத்தனர்.
நாளை சரணடைய அறிவுறுத்தல்
வழக்கின் இறுதியில் காவல்துறை தரப்பில் சவுக்கு சங்கருக்கு வழங்கப்பட்ட இடைக்கால ஜாமீன் மார்ச் 25-ஆம் தேதியுடன் (நாளை) முடிவடைகிறது. எனவே அவர் நாளை சரணடைய வேண்டும் என உத்தரவிடக் கோரப்பட்டது. இதற்குப் பதிலளித்த நீதிபதிகள், “நாளை அவர் சரணடையாவிட்டால், சட்டப்படி என்ன நடைமுறைகளை மேற்கொள்ள வேண்டுமோ (கைது செய்வது உள்ளிட்டவை) அதனை காவல்துறை தாராளமாகச் செய்யலாம்” எனத் தெளிவுபடுத்தினர்.
ஆட்கொணர்வு மனு (Habeas Corpus) தள்ளுபடி என்றால் என்ன?
ஒருவர் சட்டவிரோதமாகக் காவலில் வைக்கப்பட்டிருக்கும்போது அவரை நீதிமன்றத்தில் ஆஜர்ப்படுத்தக் கோருவதுதான் 'ஆட்கொணர்வு மனு'. ஆனால், சவுக்கு சங்கர் சட்டப்படியான ஒரு வழக்கின் கீழ் கைது செய்யப்பட்டு சிறையில் இருப்பதால், இது சட்டவிரோதக் காவல் அல்ல எனக் கருதி நீதிமன்றம் இந்த மனுவைத் தள்ளுபடி செய்துள்ளது. இதனால் அவர் மீண்டும் சிறைக்குச் செல்ல வேண்டிய கட்டாயம் ஏற்பட்டுள்ளது.
