திருவரங்கம் திமுக MLA பழனியாண்டிக்கு சொந்தமான குவாரியில் செய்தி சேகரிக்க சென்ற ஊடகவியலாளர்கள் தாக்கப்பட்ட வழக்கை CBI விசாரணைக்கு மாற்றக் கோரி தாக்கல் செய்யப்பட்ட மனு குறித்து பதிலளிக்குமாறு தமிழக காவல்துறைக்கு சென்னை உயர் நீதிமன்றம் உத்தரவிட்டுள்ளது.
சம்பவத்தின் பின்னணி
கரூர் மாவட்டம் குளித்தலையில் திருவரங்கம் தொகுதி சட்டமன்ற உறுப்பினர் பழனியாண்டிக்கு சொந்தமான சட்டவிரோத குவாரி இயங்கி வருவதாக கூறப்படுகிறது. இது குறித்து செய்தி சேகரிக்க கடந்த ஜனவரி 30-ஆம் தேதி ‘நியூஸ் தமிழ்’ தொலைக்காட்சியின் செய்தியாளர் கதிரவன் மற்றும் ஒளிப்பதிவாளர் செபாஸ்டியன் ஆகியோர் அங்கு சென்றனர். அப்போது MLA பழனியாண்டி மற்றும் அவரது ஆதரவாளர்கள் செய்திக்குழுவினரை தாக்கி, அவர்களின் கேமரா உள்ளிட்ட உபகரணங்களை சேதப்படுத்தியதாக குளித்தலை காவல் நிலையத்தில் புகாரளிக்கப்பட்டது.
வழக்கின் வாதங்கள்
தாக்கப்பட்ட செய்தியாளர் கதிரவன் சார்பில் சென்னை உயர் நீதிமன்றத்தில் தாக்கல் செய்யப்பட்ட மனுவில் முன்வைக்கப்பட்ட முக்கிய குற்றச்சாட்டுகள்
- ஆதாரங்கள் இருந்தும் மெத்தனப்போக்கு: தாக்குதல் குறித்த வீடியோ ஆதாரங்கள் இருந்தும், குளித்தலை காவல்துறையினர் MLA பழனியாண்டிக்கு சாதகமாக செயல்படுகின்றனர்.
- அதிகாரப் பலம்: MLA தனது அரசியல் மற்றும் அதிகார பலத்தை பயன்படுத்தி விசாரணையை நீர்த்துப் போக செய்யக்கூடும் என்பதால், இந்த வழக்கினை CBI அல்லது வேறு ஏதேனும் தன்னாட்சி அமைப்பிற்கு மாற்ற வேண்டும்.
நீதிமன்றத்தின் உத்தரவு
இந்த மனு நீதிபதி ஏ.டி. ஜெகதீஷ் சந்திரா முன்னிலையில் விசாரணைக்கு வந்தது. அப்போது காவல்துறை சார்பில் ஆஜரான கூடுதல் குற்றவியல் வழக்கறிஞர் கே.எம்.டி. முகிலன், இவ்வழக்கில் முறையான விசாரணை நடைபெற்று வருவதாகவும், இதுவரை.
காவல்துறையின் விளக்கத்தை ஏற்றுக்கொண்ட நீதிபதி, இது குறித்து விரிவான பதில் மனு தாக்கல் செய்ய உத்தரவிட்டு, வழக்கின் அடுத்தகட்ட விசாரணையை மார்ச் 23-ஆம் தேதிக்கு ஒத்திவைத்தார்
