பகுஜன் சமாஜ் கட்சியின் மாநிலத் தலைவராக இருந்த ஆம்ஸ்ட்ராங் கொலை வழக்கில் குற்றம் சாட்டப்பட்ட அஸ்வத்தாமன் உள்ளிட்ட 12 பேர் சரணடைவதற்கான கால அவகாசத்தை மார்ச் 13-ஆம் தேதி வரை நீட்டித்து சென்னை உயர் நீதிமன்றம் இன்று உத்தரவிட்டுள்ளது.
வழக்கின் பின்னணி
இந்த வழக்கில் கைது செய்யப்பட்ட அஸ்வத்தாமன் உள்ளிட்ட 12 பேருக்கு சென்னை முதன்மை அமர்வு நீதிமன்றம் வழங்கிய ஜாமீனை சென்னை உயர் நீதிமன்றம் அண்மையில் ரத்து செய்தது. மேலும், அவர்கள் அனைவரும் மார்ச் 6-ஆம் தேதிக்குள் சென்னை முதன்மை அமர்வு நீதிமன்றத்தில் சரணடைய வேண்டும் என ஏற்கனவே உத்தரவிடப்பட்டிருந்தது.
சரணடைய அவகாசம் கோரி மனு
இந்நிலையில், ஜாமீன் ரத்து செய்யப்பட்டதை எதிர்த்து உச்ச நீதிமன்றத்தில் மேல்முறையீடு செய்ய திட்டமிட்டுள்ளதால், வழக்கறிஞரை நியமிக்க ஏதுவாக சரணடைவதற்கு நான்கு வார கால அவகாசம் வழங்க வேண்டும் என்று அஸ்வத்தாமன் உள்ளிட்ட 12 பேரும் உயர் நீதிமன்றத்தில் மனுத் தாக்கல் செய்திருந்தனர்
நீதிமன்றத்தின் உத்தரவு
இந்த மனுவை விசாரித்த நீதிபதி சி. குமரப்பன், சரணடைவதற்கான கால அவகாசத்தை மார்ச் 13-ஆம் தேதி வரை நீட்டித்து உத்தரவிட்டார். இருப்பினும், குற்றம் சாட்டப்பட்டவர்கள் மார்ச் 13-ஆம் தேதி வரை தினமும் காலையில் விசாரணை நீதிமன்றத்தில் நேரில் ஆஜராகி கையெழுத்திட வேண்டும் என நிபந்தனை விதித்துள்ளார்.
