பழனி கோயில் நிதியிலிருந்து ₹162.54 கோடி செலவில் தங்கும் விடுதிகள், விளையாட்டு அரங்கம் உள்ளிட்ட 11 கட்டுமானப் பணிகளை மேற்கொள்ள இந்து சமய அறநிலையத்துறை வெளியிட்ட டெண்டர் அறிவிப்பை எதிர்த்துத் தொடரப்பட்ட வழக்கில், பணிகளைத் தொடங்கத் தடை விதித்ததோடு, தற்போதைய நிலையே நீடிக்க வேண்டும் (Status Quo) என சென்னை உயர் நீதிமன்ற மதுரை கிளை உத்தரவிட்டுள்ளது.
வழக்கின் பின்னணி
சென்னையைச் சேர்ந்த வினோத் ராகவேந்திரன் தாக்கல் செய்த மனுவில் கோயில் நிதியை வளர்ச்சிப் பணிகள் என்ற பெயரில் வேறு பயன்பாட்டுக்கு (உதாரணமாக: கல்லூரி உள்விளையாட்டு அரங்கம்) மாற்றுவது சட்டவிரோதமானது. ஏற்கனவே ₹45.63 கோடியில் விடுதி கட்ட டெண்டர் விடப்பட்டுள்ள நிலையில், மீண்டும் அதே பணிக்காக ₹72.45 கோடியில் புதிய டெண்டர் அறிவிக்கப்பட்டுள்ளது. டெண்டர் ஆவணங்கள் கோயில் இணையதளத்தில் முறையாகப் பதிவேற்றப்படவில்லை; மிகவும் குறுகிய காலத்தில் ரகசியமாக டெண்டர் இறுதி செய்யப்பட்டுள்ளது என அடுக்கடுக்காக குற்றம் சாட்டியுள்ளார்.
அரசாணையை ரத்து செய்யக் கோரல்
கோயில் நிதியில் 11 புதிய பணிகளை மேற்கொள்ள அனுமதி வழங்கிய அரசாணையை செயல்படுத்த உடனடியாகத் தடை விதிக்க வேண்டும். பக்தர்களின் வசதிக்காகப் பயன்படுத்தப்பட வேண்டிய கோயில் பணம், தேவையற்ற கட்டுமானப் பணிகளுக்கு வீணடிக்கப்படுவதைத் தடுக்க வேண்டும் என மனுதாரர் தனது கோரிக்கைகளை முன்வைத்தார்.
உத்தரவு
இந்த மனுவை விசாரித்த நீதிபதிகள் பழனி கோயில் நிதியில் மேற்கொள்ளப்பட உள்ள 11 கட்டுமானப் பணிகளிலும் தற்போதைய நிலையே நீடிக்க வேண்டும். அதாவது, அடுத்த உத்தரவு வரும் வரை எந்தப் பணியையும் தொடங்கக்கூடாது. பழனி கோயிலில் தற்போதுள்ள விடுதிகளை இடித்துவிட்டுப் புதிய விடுதி கட்ட வேண்டிய அவசியம் உள்ளதா? என்பதை ஆய்வு செய்ய ஓய்வுபெற்ற நீதிபதி பாரதிதாசன் நியமிக்கப்பட்டுள்ளார். அவர் நேரில் ஆய்வு நடத்தி, தனது விரிவான அறிக்கையை வரும் ஜூன் 6, 2026 அன்று நீதிமன்றத்தில் தாக்கல் செய்ய வேண்டும் என நீதிபதிகள் உத்தரவிட்டுள்ளனர்.
கோயில் நிதி எதற்குப் பயன்படுத்தப்பட வேண்டும்?
இந்து சமய அறநிலையத் துறை சட்டப்படி, ஒரு குறிப்பிட்ட கோயிலின் வருமானம் முதன்மையாக அந்தக் கோயிலின் பராமரிப்பு, நித்ய கால பூஜைகள், திருவிழாக்கள் மற்றும் அந்தக் கோயிலுக்கு வரும் பக்தர்களுக்கான அடிப்படை வசதிகளுக்கே பயன்படுத்தப்பட வேண்டும். கல்வி நிறுவனங்கள் அல்லது பொதுப் பணிகளுக்கு அந்த நிதியை மடைமாற்றம் செய்யும்போது, அது சட்டப்படி செல்லுமா என்பதை நீதிமன்றங்கள் ஆய்வு செய்கின்றன. பழனி விவகாரத்தில், தேவையற்ற கட்டுமானங்கள் மூலம் நிதி வீணடிக்கப்படுகிறதா என்பதைக் கண்டறியவே இந்த ஓய்வுபெற்ற நீதிபதி குழு அமைக்கப்பட்டுள்ளது.
