திருமணமான நபர்கள் தங்கள் சட்டபூர்வமான வாழ்க்கைத்துணையை விவாகரத்து செய்யாமல், மற்றொருவருடன் ‘லிவ்-இன்’ (Live-in) உறவில் ஈடுபடுவது சட்டப்படி அங்கீகரிக்கப்படாது என்றும், அத்தகைய ஜோடிகளுக்கு போலீஸ் பாதுகாப்பு வழங்க முடியாது என்றும் அலகாபாத் உயர் நீதிமன்றம் திட்டவட்டமாகத் தீர்ப்பளித்துள்ளது.
வழக்கின் பின்னணி
உத்தரப் பிரதேசத்தைச் சேர்ந்த ஒரு ஆணும், பெண்ணும் தாக்கல் செய்த ‘ரிட்’ மனுவில். அவர்கள் இருவருக்கும் ஏற்கனவே தனித்தனியே திருமணம் நடைபெற்று ஆணுக்கு மனைவியும் பெண்ணுக்கு கணவரும் உள்ளனர். இந்நிலையில் இருவரும் தங்கள் துணையுடன் சட்டப்படி விவாகரத்து பெறாமல் ஒன்றாக வசித்து வந்துள்ளனர். இவர்களின் இந்த உறவுக்குக் குடும்பத்தினர் தரப்பில் கடும் எதிர்ப்பு இருப்பதாலும், உயிருக்கு அச்சுறுத்தல் இருப்பதாலும் தங்களுக்குப் போலீஸ் பாதுகாப்பு வழங்க வேண்டும் என அவர்கள் நீதிமன்றத்தை நாடினர்.
நீதிபதி விவேக் குமார் சிங் வழங்கிய சட்ட விளக்கங்கள்
இந்த மனுவை விசாரித்த நீதிபதி, “திருமணம் என்பது ஒரு புனிதமான சமூகக் கட்டமைப்பு. அதனைச் சட்டப்படி முடிக்காமல் மற்றொருவருடன் இணைவது சமூக ஒழுக்கத்திற்கு எதிரானது மட்டுமல்ல, சட்டத்திற்கும் புறம்பானது.” தனிநபர் சுதந்திரம் மற்றும் வாழ்வுரிமை (Article 21) அனைவருக்கும் உண்டு. ஆனால், அந்தச் சுதந்திரம் என்பது மற்றவர்களின் (சட்டபூர்வ மனைவி அல்லது கணவன்) உரிமைகளைப் பாதிப்பதாக இருக்கக்கூடாது. சட்டவிரோதமான அல்லது சட்ட அங்கீகாரம் இல்லாத உறவுகளுக்குப் பாதுகாப்பு வழங்கும்படி அரசுக்கோ அல்லது காவல்துறைக்கோ நீதிமன்றம் உத்தரவிட முடியாது என திட்டவட்டமாக தெரிவித்தார்.
ஏன் இந்தத் தீர்ப்பு முந்தைய தீர்ப்புகளில் இருந்து மாறுபடுகிறது?
சமீபத்தில் இதே நீதிமன்றம் மற்றொரு ‘லிவ்-இன்’ தம்பதிக்குப் பாதுகாப்பு வழங்கியிருந்தது. ஆனால், முந்தைய வழக்கில் ஒருவர் மட்டுமே திருமணமானவராக இருந்தார். ஆனால், இந்த வழக்கில் ஆண், பெண் இருவருமே திருமணமானவர்கள். இருவருமே விவாகரத்து பெறாததால், அவர்களின் சட்டபூர்வமான கணவன் மற்றும் மனைவியின் உரிமைகள் பாதிக்கப்படுவதாக நீதிமன்றம் கருதியது.
விவாகரத்து பெறாமல் மற்றொருவருடன் வாழ்வது Adultery போன்றது; இது சட்டப்படி அங்கீகரிக்கப்பட்ட உறவு அல்ல என நீதிபதி சுட்டிக்காட்டினார்.
நீதிமன்றத்தின் இறுதி முடிவு
மனுதாரர்களின் கோரிக்கையை நிராகரித்த நீதிமன்றம், அவர்களின் மனுவைத் தள்ளுபடி செய்தது. இதன் மூலம், திருமண பந்தத்தை முறிக்காமல் ‘லிவ்-இன்’ உறவில் ஈடுபடுபவர்களுக்கு நீதிமன்றம் சட்டப் பாதுகாப்பு வழங்காது என்பது உறுதி செய்யப்பட்டுள்ளது.
'அடல்ட்ரி' (Adultery) குற்றமா?
உச்ச நீதிமன்றம் 2018-ல் 'அடல்ட்ரி' என்பதை ஒரு கிரிமினல் குற்றமல்ல என்று அறிவித்தது உண்மைதான். ஆனால், அது இன்னும் ஒரு சிவில் குற்றமாக கருதப்படுகிறது. அதாவது, இதைக் காரணமாக வைத்து ஒருவர் விவாகரத்து கோரலாம். அலகாபாத் நீதிமன்றம் இங்கே சொல்வது என்னவென்றால், ஒரு சட்டவிரோதச் செயலை (சட்டப்பூர்வ விவாகரத்து இன்றி இணைவது) செய்துவிட்டு, அதற்குப் பாதுகாப்பு கேட்டு நீதிமன்றத்தை அணுக முடியாது என்பதேயாகும்.
