கூட்டுத் திருமணத்தில் சிறுமிக்குத் திருமணம் – வழக்கை முடித்து வைத்தது மதுரை அமர்வு!

தஞ்சாவூரில் கடந்த 2023-ஆம் ஆண்டு நடைபெற்ற கூட்டுத் திருமண விழாவில் 16 வயது சிறுமிக்கு திருமணம் நடந்த சம்பவத்தை அடுத்து, இத்தகைய திட்டங்களை கண்காணிக்கக் கோரித் தொடரப்பட்ட பொதுநல வழக்கை, “சம்பந்தப்பட்டவர்கள் மீது ஏற்கனவே நடவடிக்கை எடுக்கப்பட்டுள்ளது” என்று கூறி நீதிமன்றம் முடித்து வைத்தது.

வழக்கின் பின்னணி

தஞ்சையைச் சேர்ந்த செந்தமிழ்ச்செல்வன் என்பவர் உயர்நீதிமன்ற மதுரை அமர்வில் தாக்கல் செய்த மனுவில் 2023-ஆம் ஆண்டு 85 ஜோடிகளுக்கு நடத்தப்பட்ட ஒரு பெரிய கூட்டுத் திருமண விழாவில், 16 வயதுடைய சிறுமி ஒருவருக்கும் திருமணம் செய்து வைக்கப்பட்டுள்ளது. அந்தச் சிறுமி கருவுற்று, பிரசவத்திற்காக மருத்துவமனையில் அனுமதிக்கப்பட்டபோதுதான் அவரது உண்மையான வயது 16 என்பது தெரியவந்தது.

இது தொடர்பாக சிறுமியின் கணவர் மீது மட்டும் போக்சோ (POCSO) வழக்கு பதியப்பட்டுள்ளது. ஆனால், திருமணத்தை முன்னின்று நடத்தியவர்கள் மீது நடவடிக்கை இல்லை. எனவே, இனிவரும் காலங்களில் கூட்டு திருமணத் திட்டங்கள் குழந்தை திருமணங்களுக்காக தவறாக பயன்படுத்தப்படுவதைத் தடுக்க, கடுமையான ஒழுங்குமுறை விதிகளை (Regulations) அரசு உருவாக்க வேண்டும் என கோரிக்கை வைக்கப்பட்டது

நீதிமன்றத்தின் விசாரணை மற்றும் தீர்ப்பு

இந்த மனு நீதிபதிகள் என். சதீஷ்குமார் மற்றும் ஜோதிராமன் ஆகியோர் அடங்கிய அமர்வில் விசாரணைக்கு வந்தது. இச்சம்பவம் தொடர்பாக ஏற்கனவே காவல்துறை வழக்குப் பதிவு செய்துள்ளது என்றும், சட்டப்படி உரிய விசாரணை மற்றும் நடவடிக்கைகள் எடுக்கப்பட்டு வருகின்றன என்றும் அரசுத் தரப்பில் தெரிவிக்கப்பட்டது. அரசுத் தரப்பு விளக்கத்தைப் பதிவு செய்துகொண்ட நீதிபதிகள், “இந்தக் குறிப்பிட்ட சம்பவம் தொடர்பாக ஏற்கனவே வழக்கு பதியப்பட்டுத் தேவையான நடவடிக்கைகள் எடுக்கப்பட்டுள்ளதால், இந்த மனுவைத் தொடர்ந்து விசாரிக்க வேண்டிய அவசியமில்லை” எனக் கூறி வழக்கை முடித்து வைத்தனர்.

ஒரு சட்ட ரீதியான பார்வை

பொதுவாகக் கூட்டுத் திருமணங்களை நடத்தும் அமைப்புகள் அல்லது அரசுத் துறைகள், மணமக்களின் வயது சான்றிதழை (ஆதார் கார்டு, பள்ளிச் சான்றிதழ் போன்றவை) முறையாக சரிபார்க்க வேண்டியது கட்டாயமாகும். 18 வயது பூர்த்தியடையாத பெண்ணுக்கு திருமணம் செய்து வைப்பது 'குழந்தைத் திருமணத் தடுப்புச் சட்டம் 2006'-ன் படி தண்டனைக்குரிய குற்றமாகும். எனவே திருமணத்தை முன்னின்று நடத்துவோர் மற்றும் திருமணத்திற்குத் துணை நின்றோர் ஆகியோரும் சட்டப்படி குற்றவாளிகளாகக் கருதப்படுவார்கள்.