“சட்டத்தில் தடை இல்லாதபோது கிரிக்கெட்டை எப்படி நிறுத்த முடியும்?” – ஐபிஎல் வழக்கை அவசரமாக விசாரிக்க சென்னை உயர் நீதிமன்றம் மறுப்பு!

தமிழக சட்டமன்றத் தேர்தலை காரணம் காட்டி சென்னையில் நடைபெறும் ஐபிஎல் (IPL) கிரிக்கெட் போட்டிகளை தள்ளிவைக்க கோரிய வழக்கை அவசர வழக்காக விசாரிக்க சென்னை உயர் நீதிமன்றம் மறுத்துவிட்டது. “போட்டிகளால் மனுதாரருக்கு என்ன தனிப்பட்ட பாதிப்பு?” என நீதிபதிகள் கேள்வி எழுப்பியுள்ளனர்.

வழக்கின் பின்னணி

சென்னையைச் சேர்ந்த திருவல்லிக்கேணி பிரபாகரன் என்பவர் தாக்கல் செய்த பொதுநல மனுவில் தமிழகத்தில் சட்டமன்றத் தேர்தல் நடைபெறவுள்ள நிலையில், ஐபிஎல் போட்டிகளுக்குப் பெருமளவிலான காவல்துறையினரைப் பாதுகாப்புப் பணியில் ஈடுபடுத்துவது தேர்தல் பணிகளைப் பாதிக்கும். சென்னை சேப்பாக்கம் மைதானத்தில் போட்டிகள் நடக்கும்போது திருவல்லிக்கேணி மற்றும் அதனைச் சுற்றியுள்ள பகுதிகளில் கடும் போக்குவரத்து நெரிசல் ஏற்படுகிறது. எனவே, தேர்தல் முடியும் வரை சென்னையில் ஐபிஎல் போட்டிகளை தள்ளிவைக்க அல்லது வேறு இடத்திற்கு மாற்ற உத்தரவிட வேண்டும் என கோரிக்கை வைத்திருந்தார்.

தலைமை நீதிபதி அமர்வின் காரசார கேள்விகள்

இந்த மனுவை அவசர வழக்காக விசாரிக்க வேண்டும் என மனுதாரர் தரப்பில் முறையீடு செய்யப்பட்டது. தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் ஆகியோர் அடங்கிய அமர்வு,

• “ஐபிஎல் போட்டிகளை நடத்துவதற்கு சட்டத்தில் எந்தத் தடையும் இல்லாதபோது, நீதிமன்றம் தலையிட்டு எப்படிப் போட்டிகளை நிறுத்த முடியும்?
• “சென்னையில் ஐபிஎல் போட்டிகள் நடப்பதால் மனுதாரருக்கு என்ன தனிப்பட்ட பாதிப்பு ஏற்படுகிறது? இது பொதுமக்களின் பொழுதுபோக்கு சார்ந்த விஷயம் அல்லவா?”
• “பாதுகாப்பு மற்றும் போக்குவரத்து மேலாண்மையை காவல்துறை கவனித்துக்கொள்ளும்; அதில் நீதிமன்றம் தலையிடத் தேவையில்லை.”

என திட்டவட்டமாக தெரிவித்தனர்

நீதிமன்றத்தின் இறுதி உத்தரவு

இந்த வழக்கை அவசரமாக விசாரிக்க நீதிபதிகள் மறுத்துவிட்டனர். “மனு முறையாக எண்ணிடப்பட்ட பிறகு (Numbered), வழக்கமான நடைமுறைப்படி விசாரணைக்கு வரும். அதற்கு முன்னதாக இதில் தலையிட முடியாது என தெரிவித்தனர்.

2026 ஐபிஎல் மற்றும் தேர்தல் நிலவரம்

தமிழகத்தில் 2026 ஏப்ரல் மற்றும் மே மாதங்களில் சட்டமன்றத் தேர்தல் மற்றும் ஐபிஎல் போட்டிகள் ஒரே நேரத்தில் வருகின்றன. ஏற்கனவே தேர்தல் ஆணையம் இது குறித்துக் கூறுகையில், "தேர்தல் பாதுகாப்புப் பணிகளுக்குப் பாதிப்பு ஏற்படாத வகையில் ஐபிஎல் போட்டிகளுக்கான பாதுகாப்புத் திட்டமிடப்பட்டுள்ளது" எனத் தெரிவித்துள்ளது.

நீதிமன்றத்தின் இந்த தடையற்ற அணுகுமுறையால், திட்டமிட்டபடி சேப்பாக்கத்தில் போட்டிகள் நடப்பது உறுதியாகியுள்ளது.