வில்லிவாக்கம் தொகுதி தவெக வேட்பாளர் ஆதவ் அர்ஜுனா, தனது மனைவிக்குத் தொடர்புடைய பல கோடி ரூபாய் மதிப்பிலான நிறுவனங்களின் விவரங்களை வேட்புமனுவில் மறைத்துள்ளதாகச் சென்னை உயர் நீதிமன்றத்தில் வழக்குத் தொடரப்பட்டுள்ளது.
வழக்கின் பின்னணி
- பெரம்பூரைச் சேர்ந்த வாக்காளர் எம். கருணாநிதி என்பவர் தாக்கல் செய்துள்ள இந்தத் தேர்தல் வழக்கில் ஆதவ் அர்ஜுனாவின் மனைவி டெய்சி ஆதவ் அவர்களுக்கு சொந்தமான மற்றும் அவர் இயக்குநராகப் பொறுப்பு வகிக்கும் 20-க்கும் மேற்பட்ட நிறுவனங்களின் விவரங்கள் வேட்புமனுவில் உள்ள பிரமாணப் பத்திரத்தில் (Affidavit) குறிப்பிடப்படவில்லை.
- குறிப்பாக, ‘மார்ட்டின் ரியல்கான் பிரைவேட் லிமிடெட்’ (Martin Realcon Private Limited) உள்ளிட்ட லாபம் ஈட்டும் பல நிறுவனங்களில் அவரது மனைவிக்கு உள்ள பங்குகள் மற்றும் முதலீடுகளை அவர் திட்டமிட்டு மறைத்துள்ளதாக மனுதாரர் குற்றம் சாட்டியுள்ளார்.
- ஆதவ் அர்ஜுனா தனது குடும்பத்தின் மொத்தச் சொத்து மதிப்பு சுமார் ₹197 கோடி எனக் காட்டியுள்ளார். ஆனால், மறைக்கப்பட்ட நிறுவனங்களின் சந்தை மதிப்பைச் சேர்த்தால் இந்தத் தொகை பல மடங்கு அதிகரிக்கும் என மனுவில் சுட்டிக்காட்டப்பட்டுள்ளது.
மனுதாரரின் வாதம்
“ஊழலற்ற, வெளிப்படையான அரசியலை முன்னெடுப்பதாகத் தமிழக வெற்றிக் கழகம் முழங்கி வரும் நிலையில், அக்கட்சியின் முக்கிய நிர்வாகியே இப்படி உண்மைகளை மறைப்பது வாக்காளர்களை ஏமாற்றும் செயலாகும்” என்று மனுதாரர் தரப்பில் காரசாரமாக மனுவில் குறிப்பிடப்பட்டுளது.
நீதிமன்றத்தில் முன்வைக்கப்பட்டுள்ள கோரிக்கைகள்
மறைக்கப்பட்ட நிறுவனங்களின் நிதி ஆதாரங்கள் மற்றும் வரி ஏய்ப்பு குறித்து வருமான வரித்துறை (Income Tax) விரிவான விசாரணை நடத்த வேண்டும். தவறான தகவல்களை அளித்ததற்காக ஆதவ் அர்ஜுனாவின் வேட்புமனுவை ஏற்ற தேர்தல் அதிகாரியின் உத்தரவை ரத்து செய்ய வேண்டும். ஏப்ரல் 23 வாக்குப்பதிவுக்கு முன்னதாகவே இந்த விசாரணை அறிக்கையைத் தேர்தல் ஆணையம் வெளியிட வேண்டும் உள்ளிட்ட கோரிக்கைகளை மனுதாரர் வைத்துள்ளார்.
தற்போதைய சட்ட நிலை
இந்த வழக்கு சென்னை உயர் நீதிமன்றத் தலைமை நீதிபதி அமர்வு முன்னிலையில் விரைவில் விசாரணைக்கு வரவுள்ளது. ஏற்கனவே விஜய், உதயநிதி ஸ்டாலின், தமிழிசை சௌந்தரராஜன், வானதி சீனிவாசன் மற்றும் அதிமுக முன்னாள் அமைச்சர்கள் மீதும் சொத்து மறைப்பு புகார்கள் எழுந்துள்ளதால், இவை அனைத்தையும் ஒரே முக்கியத்துவத்துடன் நீதிமன்றம் அணுக வாய்ப்புள்ளது.
