“கிராம சபை கூட்டத்தில் நிறைவேற்றப்படும் தீர்மானங்களை அரசு அதிகாரிகள் அலட்சியப்படுத்தக் கூடாது” எனக் கடும் கண்டனம் தெரிவித்துள்ள சென்னை உயர் நீதிமன்ற மதுரை கிளை, ஜல்லிக்கட்டுப் புகழ்பெற்ற அலங்காநல்லூர் பகுதியில் தனியார் மதுபானக் கூடத்திற்கு வழங்கப்பட்ட உரிமத்தை ரத்து செய்து உத்தரவிட்டுள்ளது.
வழக்கின் பின்னணி
மதுரையை சேர்ந்த சோனைமுத்து உள்ளிட்டோர் தாக்கல் செய்த பொதுநல மனுவில் அலங்காநல்லூர் ஒன்றியத்திற்குட்பட்ட தண்டலை, புதுப்பட்டி, மேட்டுப்பட்டி ஆகிய கிராம ஊராட்சிகள், தங்கள் பகுதியில் மதுக்கடைகள் அல்லது மதுபானக் கூடங்கள் திறக்கக் கூடாது என தங்கள் கிராம சபை கூட்டங்களில் ஒருமனதாகத் தீர்மானம் நிறைவேற்றியிருந்தன. கிராம மக்களின் இந்த எதிர்ப்பையும் மீறி, தண்டலை கிராமத்தில் ஒரு தனியார் மதுபானக் கூடத்திற்கு (Bar) அதிகாரிகள் அவசர கதியில் அனுமதி வழங்கியுள்ளனர்.
உலகப்புகழ்பெற்ற அலங்காநல்லூர் ஜல்லிக்கட்டு நடைபெறும் பகுதியில் இத்தகைய மதுபானக் கூடங்கள் அமைப்பது, அந்தப் பகுதியின் கலாச்சார மதிப்பையும், அமைதியையும் சீர்குலைக்கும் என மனுவில் கூறப்பட்டிருந்தது.
நீதிபதிகள் வழங்கிய தீர்ப்பு
இந்த மனுவை விசாரித்த நீதிபதிகள், என். சதீஷ்குமார், ஜோதிராமன் “இந்திய அரசியலமைப்பு சட்டத்தின்படி, கிராம சபை மற்றும் ஊராட்சி மன்றங்கள் மக்கள் நலன் சார்ந்த முடிவுகளை எடுக்கும் உயர்ந்த அதிகாரம் கொண்டவை என்பதை தெளிவுப்படுத்தின. மக்களின் ஆரோக்கியம் மற்றும் அமைதிக்கு எதிராக மதுபானக் கடை வேண்டாம் என ஒரு ஊராட்சி மன்றம் தீர்மானம் நிறைவேற்றியிருக்கும் போது, அதிகாரிகள் அதனை ஒருபோதும் அலட்சியப்படுத்தக் கூடாது என திட்டவட்டமாக தெரிவித்தனர்.
மதுபானக் கூடங்களுக்கு உரிமம் வழங்குவதற்கு முன்பு, உள்ளூர் பொதுமக்களின் நலன் பாதிக்கப்படுமா என்பதை அதிகாரிகள் கள ஆய்வு செய்ய வேண்டும். ஆனால், இந்த வழக்கில் அத்தகைய நடைமுறைகள் பின்பற்றப்படவில்லை எனவும் நீதிபதிகள் கூறினர்.
நீதிமன்றத்தின் இறுதி உத்தரவு
நீதிபதிகள், தண்டலை கிராமத்தில் தனியார் மதுபானக் கூடத்திற்கு வழங்கப்பட்ட உரிமம் சட்டவிரோதமானது எனக் கூறி அதனை உடனடியாக ரத்து செய்தனர். மக்கள் விருப்பத்திற்கு மாறாக அவசர கதியில் உரிமம் வழங்கியது விதிமீறல் என்று சுட்டிக்காட்டிய நீதிபதிகள், இனிவரும் காலங்களில் கிராம சபை தீர்மானங்களுக்கு முன்னுரிமை அளிக்கப்பட வேண்டும் என வலியுறுத்தினர்.
கிராம சபையின் அதிகாரம் என்ன?
இந்திய அரசியலமைப்புச் சட்டத்தின் 73-வது திருத்தத்தின்படி, கிராம சபை என்பது உள்ளூர் ஜனநாயகத்தின் மிக முக்கியமான அங்கமாகும். ஒரு கிராமத்தில் மதுக்கடை அமைப்பதா, தொழிற்சாலை கொண்டு வருவதா அல்லது நீர்நிலைகளைப் பாதுகாப்பதா போன்ற முக்கிய முடிவுகளை எடுக்க அந்த ஊர் மக்களுக்கே (கிராம சபை) அதிகாரம் உண்டு. இந்தத் தீர்ப்பின் மூலம், அதிகாரிகள் தன்னிச்சையாக முடிவெடுக்க முடியாது என்பதும், மக்களின் 'கூட்டு விருப்பமே' (Collective Will) இறுதியானது என்பதும் மீண்டும் உறுதி செய்யப்பட்டுள்ளது.
