நெல்லை மாவட்டம் வடதாழையூத்து ஊராட்சி மன்றத் தலைவி மீது நடத்தப்பட்ட கொலை முயற்சி வழக்கில், விசாரணை நீதிமன்றம் வழங்கிய ஆயுள் தண்டனையை உறுதி செய்து சென்னை உயர் நீதிமன்ற மதுரை அமர்வு அதிரடித் தீர்ப்பு வழங்கியுள்ளது.
சம்பவத்தின் பின்னணி
நெல்லை மாவட்டம் வடதாழையூத்து ஊராட்சியின் தலைவராகப் பட்டியல் சமூகத்தைச் சேர்ந்த பெண் ஒருவர் இருந்து வந்தார். ஊராட்சிப் பணிகளில் ஏற்பட்ட கருத்து வேறுபாடுகள் காரணமாக, 2011-ஆம் ஆண்டு ஜூன் 13-ஆம் தேதி இரவு, அவர் ஆட்டோவில் வீட்டிற்குத் திரும்பிக் கொண்டிருந்தபோது மர்ம நபர்களால் மறிக்கப்பட்டார். அவர்கள் அரிவாள் உள்ளிட்ட பயங்கர ஆயுதங்களால் அவரைத் தாக்கிக் கொலை செய்ய முயன்றனர். படுகாயமடைந்த அவரது மரண வாக்குமூலம் நீதித்துறை மாஜிஸ்திரேட்டால் பதிவு செய்யப்பட்டது.
நீதிமன்ற விசாரணை மற்றும் தண்டனை
இந்த வழக்கை விசாரித்த நெல்லை மாவட்ட அமர்வு நீதிமன்றம் (PCR), கடந்த 2024 அக்டோபர் 8-ஆம் தேதி சுப்பு, சுல்தான் மைதீன் உள்ளிட்ட 6 பேரைச் சூற்றவாளிகளாக அறிவித்து அவர்களுக்கு ஆயுள் தண்டனை விதித்தது. இந்த தண்டனையை ரத்து செய்யக் கோரி குற்றவாளிகள் தரப்பில் உயர் நீதிமன்ற மதுரை அமர்வில் மேல்முறையீடு செய்யப்பட்டது.
உயர் நீதிமன்றத்தின் அதிரடித் தீர்ப்பு
இந்த மனுவை விசாரித்த நீதிபதிகள் இளந்திரையன் மற்றும் பூர்ணிமா அமர்வு வழங்கிய முக்கியத் தீர்ப்பு விவரங்கள்
- நம்பகமான சாட்சியம்: பாதிக்கப்பட்டவர் அளித்த மரண வாக்குமூலம் மற்றும் சாட்சியங்கள் நம்பகமானவை.
- வன்கொடுமைத் தடுப்புச் சட்டம்: பாதிக்கப்பட்டவர் பட்டியல் சமூகத்தைச் சேர்ந்தவர் என்பதைத் தெரிந்தே இந்தத் தாக்குதல் நடத்தப்பட்டுள்ளதால், இதில் SC/ST வன்கொடுமை தடுப்புச் சட்டப் பிரிவுகள் பொருந்தும்.
- தண்டனை உறுதி: கீழ் நீதிமன்றம் வழங்கிய தண்டனையில் தலையிட வேண்டிய அவசியமில்லை எனக் கூறி, 6 பேரின் மேல்முறையீட்டு மனுக்களையும் நீதிமன்றம் தள்ளுபடி செய்தது.
