மதுரையைச் சேர்ந்த தொழிலதிபரின் மகள்களைக் கடத்தி ₹50 லட்சம் பறித்த வழக்கில், 4 பேருக்கு விதிக்கப்பட்ட ஆயுள் தண்டனையை உறுதி செய்தும், போதிய ஆதாரங்கள் இல்லாத 5 பேரை விடுவித்தும் உயர் நீதிமன்ற மதுரை கிளை அதிரடித் தீர்ப்பு வழங்கியுள்ளது.
வழக்கின் பின்னணி
கடந்த 2017-ம் ஆண்டு மதுரையை சேர்ந்த பிரபல தொழிலதிபர் கார்த்திகை செல்வம் என்பவரது இரண்டு மகள்கள் பள்ளி முடிந்து வீடு திரும்பிக் கொண்டிருந்தனர். அப்போது போலீஸ் போல வேடமிட்டு வந்த ஒரு கும்பல், வாகனத்தை சோதனையிடுவது போல நடித்து, ஓட்டுநர் பாண்டியை தாக்கிவிட்டு சிறுமிகளைக் கடத்திச் சென்றது. முதலில் ₹2 கோடி கேட்ட கடத்தல் கும்பல், பின்னர் ₹50 லட்சம் பெற்றுக்கொண்டு சிறுமிகளை நள்ளிரவில் வீட்டின் அருகே இறக்கிவிட்டுச் சென்றது. தெப்பக்குளம் போலீசார் செல்போன் சிக்னல்களை வைத்து ரவீந்திரன் உள்ளிட்ட 10 பேரைக் கைது செய்தனர்.
விசாரணை நீதிமன்றத் தீர்ப்பு
இந்த வழக்கை விசாரித்த மதுரை மகிளா நீதிமன்றம், கடந்த 2022-ம் ஆண்டு குற்றம் சாட்டப்பட்ட 2 பெண்கள் உட்பட 10 பேருக்கும் ஆயுள் தண்டனை விதித்துத் தீர்ப்பளித்தது. இதனை எதிர்த்து 9 பேர் உயர் நீதிமன்றத்தில் மேல்முறையீடு செய்தனர்.
உயர் நீதிமன்றத்தின் அதிரடித் தீர்ப்பு
இந்த மேல்முறையீட்டு மனு நீதிபதிகள் ஆனந்த் வெங்கடேஷ் மற்றும் கே.கே. ராமகிருஷ்ணன் அமர்வில் விசாரணைக்கு வந்தது. வழக்கை ஆய்வு செய்த நீதிபதிகள் கடத்தலில் நேரடியாகத் தொடர்புடைய மற்றும் முக்கியச் சூத்திரதாரிகளாகக் கருதப்படும் ரவீந்திரன், கண்ணன் (எ) பிச்சைக் கண்ணன், மணிராஜ், ஜீவஜோதி ஆகிய 4 பேருக்கு விதிக்கப்பட்ட ஆயுள் தண்டனையை நீதிமன்றம் உறுதி செய்தது. இவ்வழக்கில் போதிய ஆதாரங்கள் மற்றும் குற்றச்சாட்டுகள் நிரூபிக்கப்படாததால் மணிகண்டன், வைரமுத்து, சின்னதுரை, குணசேகரன் மற்றும் கலாதேவி ஆகிய 5 பேரை விடுதலை செய்து நீதிபதிகள் உத்தரவிட்டனர்.
நீதிமன்றத்தின் பார்வை
குழந்தைகளைக் கடத்திப் பணம் பறிக்கும் செயல்கள் சமூகத்தில் கடும் விளைவுகளை ஏற்படுத்தும் எனக் குறிப்பிட்ட நீதிபதிகள், முக்கியக் குற்றவாளிகளுக்குத் தண்டனையைக் குறைப்பதற்கு எந்த முகாந்திரமும் இல்லை எனத் தெரிவித்தனர்.
