தேர்தலுக்குப் பின் ₹8000 வழங்கப்படும் என திமுகவினர் கூப்பன்களை விநியோகிப்பதாக எழுந்த புகார்களுக்குத் தமிழகத் தேர்தல் ஆணையம் முற்றுப்புள்ளி வைத்துள்ளது. “இது முற்றிலும் தவறானது மற்றும் மக்களை ஏமாற்றும் செயல்” என ஆணையம் திட்டவட்டமாகத் தெரிவித்துள்ளது.
சர்ச்சையின் பின்னணி
தமிழகத்தின் பல்வேறு பகுதிகளில், குறிப்பாக கிராமப்புறங்களில், திமுகவினர் சில காகிதக் கூப்பன்களை வழங்கி வருவதாக எதிர்க்கட்சிகள் குற்றம் சாட்டின. தேர்தலில் வெற்றி பெற்ற பிறகு இந்த கூப்பனைக் காட்டினால் ₹8000 ரொக்கப்பணம் வழங்கப்படும் என்று கூறி வாக்காளர்களிடம் ஓட்டுச் சேகரிப்பதாகப் புகார்கள் எழுந்தன. இந்தக் கூப்பன்களில் தேர்தல் ஆணையத்தின் ‘சான்றிதழ்’ பெற்றது போன்ற வாசகங்கள் இடம் பெற்றிருந்ததால், இது அதிகாரப்பூர்வமானதோ என மக்கள் குழப்பமடைந்தனர்.
தேர்தல் ஆணையத்தின் விளக்கம்
- இது குறித்துப் புகார்கள் குவிந்ததையடுத்து, தமிழகத் தலைமைத் தேர்தல் அதிகாரி வெளியிட்டுள்ள அதிகாரப்பூர்வ விளக்கத்தில் “தேர்தல் ஆணையம் வழங்கியதாகக் கூறப்படும் சான்றிதழ், மின்னணு ஊடகங்களில் (டிவி, சமூக வலைதளம்) விளம்பரங்களை ஒளிபரப்ப மட்டுமே வழங்கப்பட்டது. இது அச்சிடப்பட்ட பிரசுரங்களுக்கோ அல்லது கூப்பன்களுக்கோ (Pamphlets) பொருந்தாது.
- அச்சிடப்படும் அனைத்துப் பொருட்களும் மக்கள் பிரதிநிதித்துவச் சட்டம் 1951, பிரிவு 127A-ன் கீழ் இருக்க வேண்டும். ஆனால், தற்போது பரப்பப்படும் கூப்பன்கள் அந்த விதிகளுக்கு உட்பட்டவை அல்ல. தேர்தல் ஆணையத்தின் பெயரில் பரப்பப்படும் இந்தத் தகவல் முற்றிலும் உண்மைக்குப் புறம்பானது மற்றும் தவறாக வழிநடத்தக்கூடியது. பொதுமக்கள் இத்தகைய போலி வாக்குறுதிகளை நம்பி ஏமாற வேண்டாம் என தேர்தல் ஆணையம் எச்சரிக்கை விடுத்துள்ளது.
எதிர்க்கட்சிகளின் கடும் எதிர்ப்பு
எதிர்க்கட்சிகள், இது வாக்காளர்களுக்குக் கொடுக்கப்படும் ஆசைவார்த்தை என்றும், நேரடியாகப் பணம் கொடுக்க முடியாததால் இது போன்ற ‘டம்மி கூப்பன்களை’ கொடுத்து திமுக ஏமாற்றுவதாகவும் தேர்தல் ஆணையத்தில் மனு அளித்துள்ளன.
எதிர்பார்ப்பு: தேர்தல் ஆணையத்தின் இந்த விளக்கத்தைத் தொடர்ந்து, விதிமீறலில் ஈடுபடும் நபர்கள் மற்றும் போலி கூப்பன்களை விநியோகிப்பவர்கள் மீது கடும் சட்ட நடவடிக்கை எடுக்கப்படும் என எதிர்பார்க்கப்படுகிறது.
